لولا مبارك ما كان الإخوان

# لولا #مبارك ما كان الإخوان.

- يوم 11 فبراير 2011، يوم خلع مبارك، كان 40% من المصريين أميين يجهلون القراءة والكتابة تماماً، بجانب أكتر من 50% من المصريين تحت مستوى خط الفقر.
- عصر مبارك هو أشد العصور انهياراً فى مستوى التعليم فى مصر، أصبحت منظومة التعليم تهتم بالتعليم الكمى على حساب التعليم الكيفى أكثر، فكانت النتيجة إنه بقى عندنا وهم اسمه إنسان متعلم وتصنيف هؤلاء الحقيقى "أنصاف المتعلمين"، ودول كانوا الوقود الأكبر للجماعات الدينية.
- عصر مبارك كان عصر تطبيق قاعدة "السلطة والسيادة" بامتياز، السلطة هى النظام الحاكم، السيادة هى السيطرة على الناس فى الشارع، كانت السلطة فى يد مبارك ونظامه، أما السيادة فقد سمح للإسلاميين بالسيطرة على الشارع وساعدهم فى فتح قنوات دينية للسيطرة على المصريين، وأصبح الوضع إنه مبارك بيقول للخارج إما أن تقبلونى أنا كحاكم أبدى أو البديل الديموقراطى هو الإسلاميين.
- الإخوان والإسلاميون مما سبق هما أحد فلول نظام مبارك، وكانوا استكمال لنظام مبارك.

# هستشهد بواقعتين :

1- الشيخ على جمعة فى لقاء ليه مع خيرى رمضان بعد ثورة 25 يناير فى برنامج  "مصر النهاردة" قال بالنص إنهم فى جمعية "مصر الخير" جمعوا كل أسماء الأميين فى مصر، وحطوا خطة لمحو الأمية، وإنه مسؤول كبير - ولمح على جمال مبارك - اتصل بيه وكلمه بطريقة مش كويسة وقاله إحنا عاوزين الناس دى كده.

فيديو :
https://www.youtube.com/watch?v=ylJcq2lYKsY

2- الشيخ سلطان بن محمد القاسمى - حاكم إمارة الشارقة - اتصل بقناة ONTV امبارح وقال إنه كان جمع تبرعات علشان العشوائيات وأطفال الشوارع فى مصر وعملوا خطة لعلاج المشكلتين دول وإنه لما عرض الأمر على مبارك، مبارك رفض.

فيديو :
http://www.youtube.com/watch?v=Vo_LUA38osg


الحقيقة إنه نظام مبارك كان نظام حقير بكل معانى الكلمة، تعمد إفقار وإذلال المصريين، ونظام الإخوان كان أحقر لأنه أراد الاستفادة مما فعله مبارك من كوارث بهذا الوطن وتعليق فشلهم واستبدادهم على نظام مبارك.


بقلم / أيمن أحمد